ضغوط الاسرة علي الأبناء امر مفزع - تكتبه الطالبة حنين وائل عبد السميع دربالة

ساعات الأهل بيكونوا السبب في الن

ساعات الأهل بيكونوا السبب في النكسه بتاعة عيالهم! اه يا جماعه حتي لو بيتكلموا صح بس اسلوبهم لوحده بيكون كفيل انو يحط ابنهم او بنتهم في ضغط نفسي رهيب ! سواء بقي علي مجموع في ثانويه او علي عريس مش عارفه ايه او بسب مقارنه بينهم و بين قرايبهم!

و ترجعوا تقولوا الولد طالع مشتت او البنت طالعه مشتته ليه ! و مفيش اتزان ولا عقل و تصرفاتهم غلط ! حضرتك مش مستعد تخلف و تربي صح يبقي متخلفش! حضرتك مش عارفه تحتوي بنتك و تقربي منها يبقي متخليفيهاش!

عارفه ان في أهالي بتربي صح و المجتمع للاسف بيضيع كل تربيتهم دي ، بس فعلا في أهالي تانيه بتولد احساس النقص و الغيره جوا عيالهم بشكل مريب! و الي هو شوف قريبك الفلاني عمل ايه اتعلَّم منه! و شوفي قريبتك دخلت كلية ايه و انتي في ايه ! ياريتك تبقي ربعها!

لو في شخص بيكره اهله فأهله السبب في كرهه ليهم ! ،، ناس كتير ممكن تخاف تقول الكلام ده بس دي الحقيقه والله! مع احترامي لكل الأهالي و الي معظم كلامهم صح بس اُسلوب تربيتهم غلط! و علي فكره اَي أهل ممكن يغلطوا عادي ! كلام الأهالي مش قرءان انزل من عند ربنا يعني !

معلش انا بتخيل كده لو حد طول الوقت اهله بيعايروه بحاجه او بيقارنوا بينه و بين حد تاني سواء صحابه او قرايبه! طبيعي جدا الشخص ده يتولد جواه احساس بالغيره و الحقد نحية الي بيتقارن بيهم دول !

تخيل لما يبقي اهلك هما سبب ضعفك مثلا ، سبب فشلك ؟ سبب ضغطك النفسي ؟ ، المفروض ان الأهل نقطة قوه لعيالهم و قدوه و مثل اعلي ، المفروض ان الأهل يبقوا دافع للنجاح مش سبب في الفشل ، المفروض يبقي بيتك هو الي بترتاح فيه بعد يوم تعب و إرهاق طويل مش هو سبب تعبك!

أرجوكم يا جماعه قبل ما تتجوزوا و تخلفوا و تربوا تربيه مش سويه و تطلعوا جيل مشتت ضعيف عاجز غير قادر علي تحمل المسئوليه ، اقرأوا ! مش عيب والله ،، اتعلموا تربوا ازاي و تناقشوا ازاي ، اتعلموا تتكلموا ازاي و أسلوبكم يبقي عامل ازاي ،، بدل ما عيالكم يبقوا معقدين نفسيا بسببكم!